بعد اللي كنت وحدي ربي لقاني بيك
وغير بنظرة وحدة في قلبي عشقتك
نهار اللي جات عيني في عينيك
قلبي ظرب وجاء لعندك
مدة صغيرة ربي الولف عليك
رجعت وين ما نكون يقابلني خيالك
يا بنت الناس إذا طاحت بريتي في يديك
بعد اللي تقراي حروفها رديلي جوابك
تكلمي أهدري قولي الشيئ اللي يرضيك
المهم صارحيني باللي راه في قلبك
حتى كي يكون قلبك عنده شريك
فهميني باش ما نبقاش قدام بابك
حتى كي تكوني باغية مني باش بعد عليك
قوليهالي وتأكدي ما تزيديش تشوفيني بعينك
انا قد ما كنت نعزك ونبغيك
قد مما نحملش نعيش ذليل في غرامك
قلبي كبير مي ما نرضاش باش تذليني
كل شيئ نرضى بيه لكن ما نرضاش بالذل
ما نقدرش نشوف قدري يطيح قدام عيني
حالف ما نركعش وكان مت نموت راجل
لوكان حتى اما اللي جابتني تقلي روح أخطيني
نديرلها برضاها وونخرج من الدار نرحل
قتلك نبغيك وما قتلكش بالسيف إبغيني
إذا عندك اللي تبغيه حتى شيئ ما يعطل
إذا عندك حبيب قوليهالي وهنيني
باش نقطع اليأس وما نبقاش حاصل
ماشي تبقاي ساكتة حتى تولفيني
وبعد ما يفوت الحال تقوليلي ربي يسهل
إذا راكي باغية ما نقلك راك ظلمتيني
ما تخليش جوابك عليا يطول
كي نسمع غير كلمة وحدة منك تهنيني
حتى كي تقوليلي أخطيني ماكاش أي مشكل
المشكل قاع كي بين وبين تخليني
نبقى ديما مشطون وحالي مهول
بعد ما تسمعي هاذ الكلام جاوبيني
وما تديرينيش في قفصك وتزيدي عليا الخلاخل
انا مانيش عدوك باش تحاربيني
أنا غير عاشق نحبك ومانيش ظالم
